Бишкек, 21.07.26. /Кабар/. Кыргызстанда иштеген чет элдиктерге миграциялык мыйзамдар жана салт-санаалар түшүндүрүлдү. Бул тууралуу Ички иштер министрлигинен билдиришти.
Ведомствонун маалыматына караганда, түшүндүрүү иштери Тышкы иштер министрлиги, Улуттук коопсуздук мамлекеттик комитети жана Кытайдын Кыргызстандагы элчилигинин өкүлдөрү менен биргеликте уюштурулду.
Иш-чара миграциялык мыйзамдарды бузуулардын алдын алуу жана чет элдик жарандардын укуктук маалымдуулугун жогорулатуу максатында уюштурулган.
"Анда чет элдиктерге Кыргызстандын миграциялык мыйзамдарынын талаптары, чет өлкөлүк жарандардын эмгек ишин жүргүзүү тартиби, ошондой эле укуктары жана милдеттери түшүндүрүлдү", - деп айтылат маалыматта.
Жолугушууда мыйзамдарды так сактоого, өлкөнүн салттарына жана маданиятына урматтоо менен мамиле кылууга, коомдук тартипти жана жол эрежелерин сактоого, ошондой эле өзгөчө кырдаалдар жаралган учурда компетенттүү мамлекеттик органдарга өз убагында кайрылуунун зарылдыгына өзгөчө көңүл бурулду.
