Бишкек, 05.07.26. /Кабар/. 3-июлда Жалал-Абад облусунун Чаткал районундагы Кара-Токой суусундагы көпүрөнүн сол тарабындагы түркүгүн суу алып кетип, жайлоого баруучу жол убактылуу жабылган. Бул тууралуу Өзгөчө кырдаалдар министрлигинен билдиришти.
Маалыматка ылайык, окуя болгон жерге Чаткал райондук Өзгөчө кырдаалдар бөлүмүнүн 3 куткаруучусу ыкчам нөөмөттүк унаа менен тартылган.
Жүргүзүлгөн куткаруу иштеринин жүрүшүндө асма көпүрө аркылуу жалпы 36 жаран коопсуз аймакка чыгарылды.
Алардын ичинен жетөө Россиянын, бирөө Казакстандын жана 28и кыргызстандыктар болгон
Кырдаал тиешелүү кызматтардын көзөмөлүндө.
ӨКМ жарандарга жана туристтерге тоолуу аймактарда жана дарыяларга жакын жерлерде өзгөчө этият болуп, коопсуздук эрежелерин так сактоону эскертет.
