Бишкек, 04.08.25. /Кабар/. Ысык-Көлдө чычырканактын "алтай" деп аталган тикенексиз түрү мол түшүм берип, базарда жогору бааланууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Чычырканактын аталган түрү 5 жыл мурда Тоң районунун Бөкөнбаев айылында демонстрациялык максатта отургузулган. Быйылкы жыйноо мезгилинде жогорку түшүмдүүлүк жана сапаттуу мөмөлөр менен айырмаланды.
Бул сорттун негизги артыкчылыктарынын бири — тикенектеринин жоктугу. Бул өзгөчөлүк бакты багуу жана мөмө жыйноо иштерин кыйла жеңилдетет. Мөмөлөрү ири, ширелүү жана даамдуу. Учурда бул чычырканак дүңүнөн 600 сомдон сатылып жатса, базардагы баасы 800-1000 сомго чейин жетүүдө. бул анын суроо-талабын көрсөтөт.
Адистердин айтымында, "алтай" сорту үй шартындагы чакан бактар үчүн гана эмес, ири көлөмдөгү өнөр жай плантацияларын негиздөө үчүн да келечектүү сорт катары эсептелет.
