Бишкек, 15.10.26. /Кабар/. "Винивин" мамлекеттик ишканасы быйыл 950 тоннадан ашык жүзүм жыйнады. Бул өткөн жылдагы көрсөткүчтөн 6,7 эседен ашык көп. Бул тууралуу Мамлекеттик мүлктү башкаруу боюнча мамлекеттик агенттиктен билдиришти.
Маалыматка ылайык, ишкана 2025-жылы 140 тонна, 2024-жылы 540 тонна, ал эми 2023-жылы 620 тонна жүзүм жыйнаган.
Түшүмдүн көбөйүшүнө жүзүмзарларды өз убагында иштетүү жана агротехникалык иштерди жүргүзүү шарт түзгөн. Ишкананын жүзүмзарларынын жалпы аянты 307 гектарды түзөт. Түшүм жыйноого 100дөн ашык жергиликтүү тургун тартылган.
"Кийинки этапта жыйналган жүзүмдү кайра иштетип, виноматериалдарды өндүрүү пландалууда. Бул ата мекендик шарап өндүрүшүн өнүктүрүүгө багытталган", - деп айтылат маалыматта.
