Бишкек 11.06.25 /Кабар/. Бишкек эл аралык кинофестивалы өзүнүн дүйнөлүк аренадагы беделин бекемдеп, Борбор Азиядагы кинематографияны өнүктүрүү үчүн жакшы платформага айланууда. Бул тууралуу Министрлер кабинетинин төрагасы Адылбек Касымалиев фестивалдын ачылышында билдирди.
Минкаб төрагасы фестиваль дүйнө жүзүндөгү режиссер, продюссерлерди, актерлорду, киносынчыларды жана эксперттерди бириктирип, кесиптик өсүп-өнүгүүгө, чыгармачылык жактан жакындашууга жана эл аралык кызматташтыкты бекемдөөгө чоң мүмкүнчүлүктөрдү түзүп жаткандыгын баса белгилеп, катышуучуларды өлкө башчысы Садыр Жапаровдун жана министрлер кабинетинин атынан фестивалдын ачылышы менен куттуктады.
“Акыркы учурларда Кыргызстандын экономикасында туруктуу 10-11%дык зор өсүштөр мамлекетте өзгөрүүлөрдү жаратууда. Натыйжада өлкөдө кино тармагына болгон мамиле да түп тамыры менен өзгөрдү. Үч жыл мурун бул тармакка орточо эсеп менен 80 млн сом бөлүнүп келсе, быйылкы жылы кыргыз кинематографиясына 951 млн б.а. дээрлик 1 млрд сом бөлүндү”, - деп баса белгиледи минкаб башчысы.
11-июнда III Бишкек эл аралык кинофестивалынын салтанаттуу ачылыш аземи болуп өттү. Анын алкагында кино чеберлери “асман жолдон” (кызыл килем) басып өтүшүп, иш-чара концерттик программа менен уланды. Катышууларга эл аралык өкүлдөрдөн турган калыстар тобунун курамы тааныштырылды. Фестиваль 15-июнга чейин уланат.
