Бишкек, 16.04.26 /Кабар/. Жогорку Кеңештин төрагасы Марлен Маматалиев Стамбулда Казакстандын парламентинин Мажилисинин төрагасы Ерлан Кошанов менен жолугушту.
Парламенттен билдиришкендей, анда эки өлкө ортосундагы саясий-экономикалык, маданий-гуманитардык алакаларды арттыруу маселеси талкууланып, парламенттер аралык кызматташтыкты өнүктүрүү боюнча пикир алмашышты.
Марлен Маматалиев белгилегендей, эки өлкөнүн парламенттер аралык мамилелери кыргыз-казак алакасын чыңдоонун натыйжалуу механизми бойдон калууда. Буга өткөн жылы Бишкекте Борбор Азия өлкөлөрүнүн III Парламенттер аралык форуму, ал эми Астана шаарында Парламенттер аралык кеңештин III жыйыны ийгиликтүү өткөрүлгөнүн мисал болот.
“Быйыл Парламенттер аралык кеңештин IV жыйынын Кыргызстанда уюштурууну мерчемдеп жатабыз. Аталган иш-чара салттуу достук мамилелерди чыңдап, парламенттер аралык өнөктөштүктү өрчүтүүгө кошумча түрткү берет деген ишеничтемин”, – деди Марлен Маматалиев.
Ал эми Ерлан Кошанов Кыргызстан менен кызматташтыкты кеңейтүү Казакстандын тышкы саясатында артыкчылыктуу багыт экенин айтты. Ошондой эле акыркы жылдары эки өлкө байланышы жаңы деңгээлге чыгып, бардык багыттарда жигердүү улантылып жатканын белгиледи.
