Бишкек, 11.08.26. /Кабар/. 2 026-жылдын башынан бери республикалык бюджеттин эсебинен өлкө боюнча 28 мектеп жана 3 бала бакчанын курулушу аяктады. Бул тууралуу Агартуу министрлигинен билдиришти.
Мындан тышкары, 18 мектеп жана 4 бала бакчада капиталдык оңдоп-түзөө иштери аяктаган.
"Билим берүү мекемелеринин материалдык-техникалык базасын жаңылоого да көңүл бурулууда. 2026-жылы мектептерди эмерек менен камсыз кылууга республикалык бюджеттен 67,2 млн сом каралган. Ошондой эле быйыл мугалимдерге 16 185 ноутбук таратуу пландалууда. Буга чейин 2024-жылы 27 031, 2025-жылы 20 286 ноутбук сатып алынып, мугалимдерге берилген", - деп айтылат маалыматта.
Белгилей кетсек, 21-22-августта Бишкекте Улуттук педагогикалык форум өтөт. Анда 12 жылдык билим берүү системасына өтүүнүн биринчи жылынын жыйынтыктары чыгарылып, жаңы окуу жылындагы негизги багыттар талкууланат.
