Бишкек, 26.08.25. /Кабар/. Москва районуна караган Беловодское – Төлөк унаа жолунда асфальт төшөө иштери башталды.
Транспорт жана коммуникациялар министрлигинен билдиришкендей, жумуштар № 28 Жол тейлөө ишканасы тарабынан аткарылууда.
Белгилей кетсек, быйыл мамлекеттик капиталдык салымдар беренесинин эсебинен жалпы 10 чакырым аралыкты асфальттоо каралып, курулуш иштери бардык жол салуу нормаларына жана белгиленген графикке ылайык жүрүп жатат.
Буга чейин Беловодское – Төлөк жолунун титулдук тизмеге киргизилген 3 чакырымына асфальт төшөлүп, жумуштар толук жыйынтыкталган.
Асфальт басуу иштери аяктаган соң жол кыймылы жеңилдеп, транспорт үчүн ыңгайлуу жана коопсуз шарттар түзүлөт.
