Бишкек, 08.09.25. /Кабар/. Ысык-Көл облусунун Бостери айылындагы “Кыргыз деңизи” санаторийинде XXIV эл аралык Ысык-Көл спорттук оюндары өтүүдө.
Дене тарбия жана спорт агенттигинен билдиришкендей, катышуучулар спорттун 25 түрүнөн күч сынашууда. Иш-чарага Россия, Казакстан, Өзбекстан, Тажикстан, Түркмөнстан, Азербайжан, Беларусь, Кытай, Индия, Монголия жана башка мамлекеттерден келген спортчулар катышууда.
2001-жылдан бери уюштурулуп жаткан мелдеш Борбор Азиядагы эң ири масштабдуу спорттук иш-чарага айланды.
XXIV эл аралык Ысык-Көл спорттук оюндарынын алкагында, гиря, дартс, жеңил атлетика, мас-рестлинг (таяк тартыш), стритбол жана кум үстүндө сумо боюнча жыйынтык чыгып, жеңүүчүлөр медаль жана диплом менен сыйланды.
4-сентябрда башталган оюндар 12-сентябрга чейин уланат.
