Бишкек, 18.04.2025 /Кабар/. "Бишкек жашыл курулуш" муниципалдык ишканасы борбор калаанын райондорунда сугат системаларын орнотуу жана калыбына келтирүү иштерин улантууда.
Муниципалитеттен билдиришкендей, иштер шаардык инфраструктураны жакшыртуу жана сугат иштерин үзгүлтүксүз камсыз кылуу максатында аткарылууда.
"Ишкананын кызматкерлери жашыл зоналарга суу жеткире турган арык жана лотокторду орнотуп жатышат. Бул системалар газон, бак-дарактар жана гүлзарларды натыйжалуу сугаруу үчүн маанилүү бөлүк болуп эсептелет", - деп айтылат маалыматта.
Белгиленгендей, жумуштар парктарда, магистралдык жолдордо жана коомдук жайларда жүргүзүлүүдө. Ирригациялык каналдар жер кыртышынын түзүлүшүн жана буга чейин орнотулган инженердик коммуникацияларды эске алуу менен төшөлүүдө. Бул суу керектүү жерлерге жетүүсүн камсыздайт.
Мэриядан кошумчалашкандай, учурда иштер жүрүп жаткан бардык каналдар жана лотоктор 2024-жылдын күз айларында алдын ала тазаланып, быйылкы жазда кайрадан тазалоодон өткөрүлгөн.
