Бишкек, 12.11.26. /Кабар/. Борбор Азияда климаттык туруктуулукту жогорулатуу жана жаратылыш экосистемаларын калыбына келтирүү үчүн жети жыл ичинде 200 млн евродон ашык каражат тартылат.
Жаратылыш ресурстары, экология жана техникалык көзөмөл министрлигинен билдиришкендей, бул маселе БУУнун Климаттын өзгөрүүсү боюнча алкактык конвенциясынын тараптарынын 31-конференциясынын алкагында Анталияда өткөн министрлердин жолугушуусунда талкууланды. Ага министр Акыл Токтобаев катышты.
Каражат тоо экосистемаларын, токойлорду жана жайыттарды калыбына келтирүүгө, айыл чарбасына климатка туруктуу ыкмаларды киргизүүгө, ошондой эле фермерлер менен жергиликтүү жамааттарды колдоого багытталат.
Министр программанын Кыргызстан үчүн маанисин белгилеп, тоо экосистемаларын жана суу ресурстарын сактоо бүтүндөй аймактын экологиялык коопсуздугу үчүн маанилүү экенин айтты.
