Бишкек, 13.08.26. /Кабар/. Күн мурун "Борбор-2026" биргелешкен тактикалык окуусунун алкагында 20636 аскер бөлүгүнүн окуу-машыгуу борборунун базасында аскер кызматчылары менен ок атуу жана тоо даярдыгы боюнча практикалык сабактар өткөрүлдү.
Коргоо министрлигинен билдиришкендей, машыгуунун жүрүшүндө аскер кызматчылары тоолуу аймакта АК-47 автоматын колдонуу менен ок атуу көндүмдөрүн өркүндөтүштү. Анда ок атуу позицияларын туура тандоого, куралдан так атууга жана өздүк курамдын аракеттерин бирдиктүү уюштурууга өзгөчө көңүл бурулду.
Мындан тышкары, тоо даярдыгы боюнча сабактарда аскер кызматчылары аркан менен ылдый түшүү боюнча практикалык көнүгүүлөрдү аткарышты. Көнүгүүлөр атайын жабдууларды жана колдо болгон каражаттарды колдонуу менен тоолуу шартта коопсуз жүрүү жана табигый тоскоолдуктардан өтүү көндүмдөрүн жогорулатууга багытталды.
Практикалык сабактардын негизги максаты — тоолуу аймакта аскердик аракеттерди жүргүзүү боюнча тажрыйба алмашуу, аскер кызматчыларынын жеке даярдык деңгээлин жогорулатуу жана кызматтык милдеттерди аткарууда өздүк курамдын аракеттеринин бирдиктүүлүгүн камсыз кылуу.
