Бишкек, 28.02.25. /Кабар/. Бишкек шаарынын "Новопавловка" МАБнын аймагындагы №118 мектепке кубаттуулугу 360 кВт болгон 18 бирдик жылуулук насостору орнотулду. Бул тууралуу мэриядан билдиришти.
Маалыматка ылайык, күн мурун Бишкек шаарынын мэринин орун басары Талайбек Байгазиев жана "Бишкекжылуулукэнерго" муниципалдык ишканасынын директору Улан Айтиев жаңы коюлган жабдууларды текшерди.
Белгилей кетсек, аталган жылуулук насостор "Бишкекжылуулукэнергонун" отканаларына биринчи жолу орнотулууда. Азыркы учурда шаардын билим берүү уюмдарындагы төрт отканага 48 бирдик жылытуучу насостор орнотуу стадиясында.
Негизинен, жылуулук насосунда керектелген электр энергиясы төмөнкү отундарды алмаштыра алат: көмүр, жаратылыш газы жана суюк отун.
"Иштер, борбор калаадагы экологиялык абалды жакшыртуу жана абанын булгануусун азайтуу боюнча иш-чаралардын алкагында жүргүзүлүүдө",-деп айтылат маалыматта.
