Бишкек, 07.07.26. /Кабар/. Борбор калаадагы муниципалдык мектептердин 700 окуучусу жайкы эс алуусун "Алтын балалык" балдардын ден соолукту чыңдоо лагеринде көңүлдүү жана пайдалуу өткөрүүдө.
Мэриядан билдиришкендей, балдардын коопсуздугу үчүн окуучулар жаш өзгөчөлүктөрүнө жараша отряддарга бөлүнүп, аларга тажрыйбалуу тарбиячылар жана медициналык кызматкерлер бекитилген.
Лагердин программасы спорттук мелдештерге, интеллектуалдык таймаштарга, концерттерге жана мастер-класстарга бай.
"Лагерде коопсуздукка жана укуктук тарбияга өзгөчө басым жасалууда. Балдарга жеткиликтүү оюн форматында жол кыймылынын эрежелери жана өрт коопсуздугу, мектептеги буллингдин (кордоонун) жана башка терс көрүнүштөрдүн алдын алуу, жеке коопсуздук жана сергек жашоо образы үйрөтүлүүдө", - деп айтылат маалыматта.
Мындан тышкары, лагерде мамлекеттик органдардын жана тиешелүү кызматтардын өкүлдөрү менен жолугушуулар уюштурулуп, окуучулардын лидерлик сапаттарын жана командада иштөө көндүмдөрүн өнүктүрүүгө өзгөчө көңүл бурулууда.
