Бишкек, 01.07.25. /Кабар/. Бишкек шаарынын мэри Айбек Жунушалиевдин катышуусунда Ленин районунун аймагындагы көчмө жыйын өттү.
Муниципалитеттен билдиришкендей, жыйындын жүрүшүндө “Равза” кафесинде бир катар бузуулар, тактап айтканда, тамактануу жайынын көрктөндүрүү эрежелерин сактабагандыгы аныкталды. Ошондой эле саркынды суу системасында да кемчиликтер бар экени белгилүү болду.
Санитардык нормалардын сакталышы боюнча Бишкек шаардык мамлекеттик санитардык-эпидемиологиялык көзөмөл борборуна тиешелүү чараларды көрүү тапшырылды.
Ошондой эле кафенин алдындагы жерди пайдалануу боюнча мыйзам бузуулар да аныкталгандыктан, демонтаждоо иштерин жүргүзүү керектиги айтылды.
Буларды эске алуу менен жеке ишкерге Укук бузуулар жөнүндө кодекске ылайык, протоколдор түзүлдү. Жалпы суммасы 52 миң сом өлчөмүндө айып салынып, бузууларды жоюуга жана колдонуудагы мыйзамдарды сактоого милдеттендирилди.
