Бишкек, 10.10.2025. /Кабар/. Бишкектеги Куланак көчөсүндө курулуш иштери аяктап, расмий түрдө транспорт кыймылына ачылды.
Муниципалитеттен билдиришкендей, 7-Апрель көчөсүнөн Көк-Жаңгак көчөсүнө чейин созулган жаңы жолдун узундугу 833 метр, туурасы 8 метрди түзөт.
Курулуш иштеринин жүрүшүндө жолду асфальттоо, тротуарларды куруу, жолдун эки тарабына ирригациялык системаны орнотуу иштери жүргүзүлдү. Ошондой эле жол белгилери орнотулуп, жол чийиндери түшүрүлдү.
Куланак көчөсүнүн курулушу 2025-жылдын июль айында башталган. Бул долбоор транспорттук инфраструктураны жакшыртуу, унаа тыгындарын азайтууга багытталган.
