Бишкек, 20.07.26. /Кабар/. Бишкек шаарында №56 муниципалдык орто жалпы билим берүү мектеби капиталдык оңдоп-түзөөдөн өтүүдө.
Муниципалитеттен билдиришкендей, бүгүнкү күндө объектте демонтаждоо иштери, ага чектеш аймакты кайра пландоо, ошондой эле имараттын фасадында металл негиздерин орнотуу жана башка курулуш-монтаж иштери жүргүзүлүүдө.
Долбоордун алкагында Бишкек шаарынын мэриясы мектепке комплекстүү капиталдык оңдоо иштерин жүргүзүп, окуучулар үчүн заманбап, коопсуз жана ыңгайлуу билим берүү шарттарын түзөт.
Курулуш иштерин "Евразия Строй" ЖЧКсы жүргүзүүдө.
Белгилей кетсек, мектеп 1971-жылы курулуп, 800 окуучуга ылайыкталган. Окуучулардын санынын көбөйүшүнө байланыштуу 1989-жылы негизги имаратка кошумча 600 орунга ылайыкталган окуу корпусу курулган.
