Ташкент, 04.07.25. /Кабар/. Күн мурун жогорку окуу жайлардын ректорлору менен кеңири форматтагы жолугушуу өттү. Бул тууралуу Илим, жогорку билим берүү жана инновациялар министрлигинен билдиришти.
Иш-чарага министрлер кабинетинин төрагасынын орун басары Эдил Байсалов жана илим министри Бактияр Орозов катышты.
Жолугушуунун негизги максаты жогорку билим берүү тармагын модернизациялоо, билим сапатын жогорулатуу жана окутуунун мазмунун заманбап талаптарга ылайыкташтыруу болду.
"Биздин максат дүйнөлүк рынокко чыга алган, жогорку квалификациялуу кадрларды даярдоо. Бул — мамлекеттик билим берүү саясатынын башкы багыттарынын бири", - деди Бактияр Орозов.
Ошондой эле жолугушууда төмөнкү маселелер көтөрүлдү:
- окуу программаларын жаңылоо жана окутуу методдорун кайра карап чыгуу;
- жогорку окуу жайлардын илимий-изилдөө иштерин өнүктүрүү;
- эл аралык кызматташтыкты кеңейтүү;
- инновацияларды киргизүү жана санариптештирүү процессин ылдамдатуу.
Мындан тышкары, жыйын учурунда Илим министрлигинин жаңы жетекчилери тааныштырылды. Тиешелүү жарлыкка ылайык Чотонов Айбек Өзүбекович министрдин биринчи орун басары Өмүров Нурлан Кубатович орун басары болуп дайындалды.
Эске салсак, үстүбүздөгү жылдын 12-майында президент Садыр Жапаров Агартуу министрлигин жана Илим, жогорку билим берүү жана инновациялар министрлигин түзүү боюнча жарлыкка кол койгон. Илим министри болуп Бактияр Орозов дайындалган.
