Бишкек, 25.09.25. /Кабар/. 22-23-сентябрда Бишкекте жергиликтүү администрациялардын, айылдык кеңештердин жана демилгелүү топтордун өкүлдөрү үчүн "Санариптик көндүмдөр" аттуу эки күндүк окутуу өттү. Бул тууралуу Санариптик өнүктүрүү жана инновациялык технологиялар министрлигинен билдиришти.
Маалыматка ылайык, тренинг "Жаштарды өнүктүрүү институту" коомдук фонду менен биргеликте, DVV International жана ЕККУнун Бишкектеги Программалык кеңсесинин колдоосу менен өткөрдү.
Тренингдин жыйынтыгында ар бир катышуучуга сертификаттар тапшырылды.
Бул окутуунун негизги максаты – жергиликтүү өз алдынча башкаруу (ЖӨБ) органдарынын санариптик мүмкүнчүлүктөрүн кеңейтүү, шаар менен айылдын санариптик шарттарындагы айырмачылыктарды азайтуу жана жаңы технологияларды колдоно билген адистерди даярдоо болду.
Программанын алкагында катышуучулар төмөнкү багыттар боюнча билим алышты:
- заманбап технологиялар жана жасалма интеллект: QR-коддорду түзүү, жасалма интеллект аркылуу текст, презентация, визуалдык материалдар жана аналитикалык маалыматтарды даярдоо;
- жасалма интеллект куралдары: ChatGPT, Gemini, DeepSeek менен иштөө, туура суроолорду түзүү жана ЖӨБ органдарынын ишинде колдонуу;
- онлайн байланыш жана социалдык тармактар: Zoom, Google Meet, Microsoft Teams платформаларынын мүмкүнчүлүктөрү, Telegram жана WhatsApp аркылуу топторду жана маалыматтык каналдарды уюштуруу;
- практикалык тапшырмалар: иш-чаралардын пландарын түзүү, жарандар менен байланыш үчүн санариптик куралдарды колдонуу, контент жаратуу.
Экинчи күнү катышуучулар практикалык көндүмдөрүн сынап, жасалма интеллекттин жардамы менен визуалдык жана сүрөт, видеолорду даярдашты.
Бул демилге ЖӨБ органдарынын кызматкерлерине жана активисттерге заманбап санариптик куралдарды ишенимдүү колдонуу мүмкүнчүлүгүн берип, жарандар менен өз ара аракеттенүүнү жакшыртууга жана жергиликтүү өз алдынча башкаруунун натыйжалуулугун жогорулатууга багытталды.
