Бишкек, 01.04.25. /Кабар/. Бишкек шаарында 2013–2014-жылдары туулган балдар арасында жазгы спартакиада өттү.
Муниципалитеттен билдиришкендей, райондук этаптан тандалган эң күчтүү спортчулар шаардык этаптагы мелдешке катышты. Анда жалпысынан 252 окуучу спорттун жети түрү боюнча күч сынашты: кыймылдуу оюндар, тег-регби, шахмат, ордо, пионербол, дартс жана кичи-футбол.
Иш-чара Бишкек шаарынын мэриясынын дене тарбия жана спорт, туризм жана жаштар менен иштөө боюнча департаменти тарабынан уюштурулду.
Спартакиаданын жыйынтыгында жеңүүчүлөр жана байге ээлери кубок, медаль жана дипломдор менен сыйланышты.
