Бишкек, 06.03.26. /Кабар/. 6-мартта М.В. Фрунзенин Мемориалдык үй-музейинде "Уркуя Салиева - кайраттуулуктун жана эркиндиктин символу" аттуу көргөзмө ачылды.
Маданият, маалымат жана жаштар саясаты министрлигинен билдиришкендей, көргөзмө Кыргызстандагы социалдык өзгөрүүлөр доорунун көрүнүктүү өкүлдөрүнүн бири болгон Уркуя Салиеванын өмүрүнө жана эрдигине арналган.
Экспозицияда анын өмүр баяны, коомдук ишмердүүлүгү жана 1920-1930-жылдардагы тарыхый доор чагылдырылат. Архивдик сүрөттөр, документтер жана "Отко таазим" көркөм тасмасы аркылуу коомдун жаңылануусу жана аялдардын тең укуктуулугу үчүн күрөшкөн аялдын образы ачылып берилет.
Көргөзмө кыргыз коомунун өнүгүшүндөгү аялдардын ролун терең түшүнүүгө багытталган жана 20 мартка чейин уланат.
