Бишкек, 26.09.25. /Кабар/. Мамлекеттик катчысы Марат Иманкулов тарыхчы Осмонаалы Сыдык уулуна арналган эл аралык конференцияга катышты.
Марат Иманкулов өз сөзүндө кыргыздын алгачкы агартуучуларынын бири, тарыхчы жана жазма мурастын негиздөөчүсү болгон Осмонаалы Сыдык уулунун илимий-агартуучулук ишмердүүлүгүн эске салды. Ошондой эле анын “билимсиз элдин келечеги караңгы болот” деген сөзүн эске салып, билим берүүнү жана илимди өнүктүрүүнүн өзгөчө маанилүүлүгүн баса белгиледи.
Мамлекеттик катчы Осмонаалы Сыдык уулунун идеялары бүгүнкү күндө да актуалдуу экенин белгиледи. Анын мурасы азыркы билим берүү, улуттук аң-сезимди өнүктүрүү жана түрк элдеринин руханий биримдиги үчүн маанилүү багыт болуп кала берет.
Эл аралык конференция түрк дүйнөсүнүн биримдигин бекемдөөгө, агартуу тармагында кызматташтыкты тереңдетүүгө жана руханий мурастын улантуучулугун сактоого багытталган. Иш-чара Эл аралык түрк академиясынын колдоосу менен уюштурулду.
