Бишкек, 27.03.26. /Кабар/. Бүгүн, 27-мартта Бишкек шаарында Шанхай кызматташтык уюмуна (ШКУ) мүчө мамлекеттердин темир жол администрацияларынын жетекчилеринин VI жолугушуусу өттү.
Ведомстводон билдиришкендей, иш-чарага "Кыргыз темир жолу" улуттук компаниясы" мамлекеттик ишканасы төрагалык кылып, ага Беларусь, Индия, Иран, Пакистан, Казакстан, Кытай, Россия, Тажикстан жана Өзбекстандын темир жол тармагынын жетекчилери жана Кыргызстандын Транспорт жана коммуникациялар министрлигинин өкүлдөрү, ошондой эле ШКУ катчылыгынын өкүлдөрү катышты.
Күн тартибиндеги негизги маселелер:
- Темир жол объекттерин модернизациялоо жана жаңыларын куруу боюнча биргелешкен аракеттер;
- Эл аралык темир жол ташууларынын деңгээлин жогорулатуу;
- Тажрыйба алмашуу жана адистердин квалификациясын жогорулатуу;
- Буга чейинки (V жолугушуудагы) кабыл алынган чечимдердин аткарылышы.
Бул жолугушуу уюмга мүчө мамлекеттердин ортосундагы транспорттук диалогду өнүктүрүүдө жана аймактагы темир жол байланыштарын координациялоодо маанилүү ролду ойнойт.
"Жыйынтыгында тараптар темир жол тармагындагы кызматташтыкты тереңдетүүгө жана эл аралык жүк ташуулардын натыйжалуулугун арттырууга багытталган бир катар маанилүү чечимдерди кабыл алышты",-деп айтылат маалыматта.
