Бишкек 16.06.25 /Кабар/. Бишкек шаарындагы «Газпром – балдарга» дене тарбия-ден соолукту чыңдоо комплексинин базасында V Night Run түнкү марафону өттү.
Бишкек мэриясынан билдиришкендей, иш-чарага 25 өлкөдөн келген 30 миңге жакын катышуучу чогулуп, 5 жана 10 чакырымдык аралыкта күч сынашты.
Марафондун расмий ачылышына шаар мэринин орун басары Виктория Мозгачева катышып, марафончуларга аралыкты жеңил чуркап, майрамдан жагымдуу эмоцияларды алып, жакшы маанайда өткөрүүнү каалады.
Ар бир фиништик чекти басып өткөн катышуучуга эстеликке медалдар тапшырылды.
Ошондой эле эркектер жана аялдар арасында дистанциялар боюнча жеңүүчүлөр аныкталып, аларга медалдар жана өнөктөштөр тарабынан баалуу белектер ыйгарылды.
Иш-чара «Номад Спорт» коомдук бирикмеси жана Бишкек мэриясынын Дене тарбия жана спорт, туризм жана жаштар менен иштөө департаменти тарабынан уюштурулду.
