Бишкек, 05.08.26 /Кабар/. Бишкек шаарында балдар үчүн кыргыз тилиндеги "Нуркидс" онлайн-платформасынын расмий бет ачары өтүүдө.
Иш-чарага Мамлекеттик тил жана тил саясаты боюнча улуттук комиссиясынын төрагасы Мелис Мураталиев, ЖК депутаты Салтанат Аманова, мамлекеттик органдардын, жалпы жана мектепке чейинки билим берүү мекемелеринин өкүлдөрү катышууда.
Долбоордун максаты — кыргыз тилин балдардын санариптик дүйнөсүнүн табигый бөлүгүнө айлантуу жана чет элдик контенттерге заманбап, кызыктуу альтернатива сунуштоо болуп саналат.
Платформадагы контенттер жалпы балдарга, ата-энелерге, бала бакчаларга жана мектептерге арналган. Санарип экосистема 2 жаштан 14 жашка чейинки балдар колдоно алышат.
Иш-чаранын алкагында кыргыз тилиндеги балдар контентин өнүктүрүүгө, билим берүү тармагын колдоого, мамлекеттик тилди жана улуттук маданий баалуулуктарды санарип мейкиндикте сактоого багытталган заманбап санариптик чечимдер сунушталат.
“Нуркидс" төмөнкүлөрдү үйрөнүүгө жардам берет:
- кыргыз алфавитин;
- сандарды жана математиканын негиздерин;
- жаратылыш, жаныбарлар жана курчап турган дүйнө тууралуу маалымат алууну;
- ой жүгүртүүнү жана сүйлөө жөндөмүн өнүктүрүүнү;
- Кыргызстандын маданияты жана салт-санаасы менен таанышууну.
Контент төмөнкүдөй форматтарда сунушталат:
- мультфильмдер;
- окутуучу видеолор;
- интерактивдүү сабактар;
- билим берүү программалары.
Бет ачар “Нуркидс" контентинин негиздөөчүлөрү жана Мамлекеттик тил жана тил саясаты боюнча улуттук комиссия тарабынан уюштурулууда.
