Бишкек, 28.09.26. /Кабар/. Бишкек шаарынын төрт районунда жер тилкелерин өз алдынча ээлеп алуу жана мыйзамсыз курулуштарды аныктоо боюнча рейддер жүргүзүлүүдө.
Муниципалитеттен билдиришкендей, рейддердин жүрүшүндө жер жана курулуш мыйзамдарынын талаптарын сактоо боюнча тургундарга түшүндүрүү иштери жүргүзүлүп, мыйзам бузган учурдагы жоопкерчилик тууралуу маалымат берилүүдө.
Биринчи май районунда 2024-жылдан бери №205, №207 жана №208 муниципалдык аймактык башкармалыктардын аймактарында мыйзамсыз тургузулган 171 пайдубал жана бүтпөй калган курулуш объекти демонтаждалган. 2026-жылы «Теңдик» конушунда мыйзамсыз пайдубал куюунун үч фактысы аныкталып, материалдар райондук ички иштер башкармалыгына жөнөтүлгөн.
Ошондой эле Октябрь районунда уруксат берүүчү документтери жок курулуп жаткан объекттер аныкталган. Мыйзамсыз курулуштарды жана жер тилкелерин өз алдынча ээлеп алуу фактыларын аныктоо боюнча рейддер улантылууда.
