Бишкек, 04.10.25 /Кабар/. Бүгүн Т.Сатылганов атындагы Кыргыз улуттук филармонияда Мугалимдер күнүнө арналган салтанаттуу иш-чара өттү.
Иш-чарага министрлер кабинетинин төрагасы Адылбек Касымалиев, агартуу министри Догдуркүл Кендирбаева, ошондой эле өлкөнүн бардык аймактарынан келген мугалимдер жана тарбиячылар катышты.
Салтанаттуу саамалык жаңы билим берүү моделине өтүү жолун чагылдырган видеоролик менен ачылды.
Андан соң көрүүчүлөргө “Алтын Казык – доор өзгөрткөн билим” аттуу театрлаштырылган пролог тартууланды.
Бул коюм аркылуу 12 жылдык билим берүү системасына өтүү жана заманбап стандарттарды киргизүү – жөн гана реформа эмес, өлкөнүн жана жаш муундун келечегин аныктаган тарыхый кадам экени баса белгиленди.
Иш-чарада педагогдорду даңазалоого өзгөчө көңүл бурулду. “Жылдын мыкты мугалими” жана “Жылдын мыкты тарбиячысы” аталышындагы республикалык конкурстун жеңүүчүлөрү жана лауреаттары акчалай сыйлыктар менен сыйланышты.
Башкы байге катары батир каралып, ал Ысык-Көл облусунун Түп районунан келген кыргыз тили жана адабияты мугалими Элзат Асановага тапшырылды.
Майрамдык иш-чара атайын даярдалган концерттик программа менен уланып, мугалимдерге жана тарбиячыларга майрамдык маанай тартууланды.
