Бишкек, 11.11.25. /Кабар/. Бишкек шаарында 2025-жылдын алты айынын ичинде майыптыгы бар адамдарга карата жасалган 9 кылмыш иши козголду. Бул тууралуу шаардык прокуратурадан билдиришти.
Маалыматта белгиленгендей, алардын ичинен 4 аялга, 4 эркекке, ал эми 1 жашы жете элек балага карата факты катталган .
Козголгон иштердин 5и сотко жөнөтүлүп, ал эми 4 иш боюнча айыпталуучулар аныкталбагандыктан өндүрүш токтотулган.
Кылмыштардын басымдуу бөлүгү Кылмыш-жаза кодексинин 154-, 155-, 205-, 206- жана 312-беренелерине ылайык катталган.
Прокуратура белгилегендей, майыптыгы бар адамдарга карата кылмыштуулук — адам укуктарына каршы олуттуу социалдык көйгөй болуп саналат. Аны жоюу үчүн мыйзамдык коргоо менен катар коомдук аң-сезимди, боорукердикти жана инклюзивдүүлүктү өнүктүрүү зарылдыгы баса белгиленет.
“Мүмкүнчүлүгү чектелген адамдар — жардамга муктаж эмес, мүмкүнчүлүккө муктаж адамдар. Аларга ошол мүмкүнчүлүктү берсек, коомубуз адилеттүүлүккө жана боорукердикке бай болот,” — деп айтылат маалыматта.
