Бишкек, 28.01.26. /Кабар/. Бүгүн Жогорку Кеңештин төрагасы Нурланбек Тургунбек уулу Кытай коомдук илимдер академиясынын президенти Гао Сян баштаган делегацияны кабыл алды.
Парламенттен билдиришкендей, жолугушууда төрага Кытай Кыргызстандын негизги өнөктөшү экенин жана соода-экономикалык алакалар тарыхый чекке жеткенин белгиледи.
Ошондой эле 2024-жылдагы өз ара расмий сапарлар парламенттер аралык кызматташтыкты жаңы деңгээлге чыгарганы айтылды.
"Кыргызстан Кытайдын илимий-техникалык жетишкендиктерин пайдаланууга жана тажрыйба алмашууга кызыкдар", - деди төрага.
Өз кезегинде Гао Сян кыргыз тарыхына байланыштуу Кытайдагы маалыматтарды биргелешип изилдөө үчүн "Мурас" фонду менен кызматташуу улантыларын билдирди.
Гао Сян төраганы Кытай коомдук илимдер академиясынын ишмердүүлүгү менен таанышып кетүүгө чакырды.
