Бишкек, 19.10.26. /Кабар/. Бишкекте шаар тургундары жана коноктору үчүн жаңы көп функционалдуу парк-оюн-зоок комплексин куруу пландалууда. Бул тууралуу мэриядан билдиришти.
Долбоорду ишке ашыруу боюнча инвестициялык келишимге мэр Айбек Жунушалиев жана "Иллюзион.кг" ЖЧКсынын башкы директору Самат Салыбаев кол коюшту.
Комплекс Ч.Валиханов жана Ахунбаев көчөлөрүнүн кесилишинде жайгашат. Долбоор шаардыктарга, өзгөчө үй-бүлөлөргө жана жаштарга бош убактысын кызыктуу өткөрүп, ыңгайлуу шартта эс алууга мүмкүнчүлүк түзүүгө багытталган.
Жунушалиев курулуш бекитилген эскиздик долбоорго ылайык жүргүзүлүп, белгиленген мөөнөттөр так сакталышы керектигин белгиледи.
Долбоор ишке ашса, борбор калаада эс алуу үчүн жаңы коомдук мейкиндик түзүлүп, шаардык инфраструктураны жана туристтик жагымдуулукту өнүктүрүүгө өбөлгө түзөт.
