Бишкек, 31.08.26. /Кабар/. “Бишкек Арена” стадионунда VI Дүйнөлүк көчмөндөр оюндарынын ачылыш аземине арналган маданий программа тартууланууда.
Алгач көчмөн элдердин урпагын улаган наристенин жарык дүйнөгө келиши сахналаштырылды. Ага улай Манас айтылып, кыргыздын бай маданий баалуулуктары даңазаланды. Көчмөн рухун айгинелеген атчандардын шоусу күйөрмандарга өзгөчө маанай тартуулады.
Ал эми “Бишкек Аренаны” Көчмөндөр оюндарынын ачылыш аземине арналган майрамдык салют дагы да көрккө бөлөдү.
Ошондой эле иш-чара азыр ата мекендик жана чет өлкөлүк аткаруучулардын концерти менен коштолууда.
