Бишкек, 23.04.25. /Кабар/. Күн мурун Бишкектеги “Ала-Тоо” кинотеатрында Грузия жана КМШ, Балтия өлкөлөрүнүн кыска метраждуу тасмаларынын XIII эл аралык кинофестивалы башталды.
Маданият министрлигинен билдиришкендей, быйыл фестивалга жакынкы жана алыскы чет өлкөлөрдөн 900дөн ашык арыз келип түшүп, бул кинофорумдун эл аралык деңгээлдеги кадыр-баркынын жогору экенин дагы бир ирет тастыктады.
Эл аралык кинофестиваль Грузия жана КМШ, Балтия өлкөлөрүнүн мыкты фильмдерин сунуштаган аянтчага айланды.
Фестивалдын программасында эки негизги конкурстук категория каралган: эл аралык жана улуттук. Аларда көркөм, даректүү, анимациялык жана эксперименталдык жанрдагы тасмалар көрсөтүлөт. Эл аралык конкурска Азербайжан, Армения, Беларус, Грузия, Казакстан, Кыргызстан, Россия, Тажикстан жана Өзбекстан сыяктуу өлкөлөрдөн тандалган 13 тасма кирген. Улуттук конкурста кыргызстандык режиссёрлор тарткан 13 мыкты кыска метраждуу тасма сунушталууда.
"Кинофестиваль жаңы таланттарды ачуу менен бирге, маданий диалогдун аянтчасы болуп, гуманитардык байланыштарды чыңдоого жана эстетикалык-руханий баалуулуктарды жайылтууга чоң салым кошот",-деп айтылат маалыматта.
