Бишкек, 12.04.25. /Кабар/. 10-11-апрелде "Учур" мамлекеттик жаштар театры КР Эл жазуучусу Мар Байжиевдин "Төрт адам" драмасынын негизинде "Эрөөл" спектаклинин бет ачарын тартуулады.
Маданият, маалымат жана жаштар саясаты министрлигинен билдиришкендей, аталган спектакль көрүүчүлөргө М. Жангазиев атындагы Кыргыз мамлекеттик куурчак театрынын сахнасында көрсөтүлдү.
Спектакль бүгүнкү коомдун эң көйгөйлүү маселеси болгон психологиялык зомбулукту, абьюзердик мамилени, аялзатынын жан дүйнөсүндөгү буюккан букту, жылчык таба албаган, депрессиялык абалды, деги эле кыз баланын тагдыры ириде ата-энесинен, коомдон анан бакыт издеген адамынан көз каранды экендигин баяндайт.
Белгилей кетсек, спектакль КР Эл жазуучусу, Кыргыз кино академиясынын академиги, Искусство институтунун профессору, "Манас" орденинин кавалери Мар Байжиевдин 90 жылдыгына карата сахнаштырылды.
