Бишкек, 04.08.26. /Кабар/. Бишкекте Элебесов жана Аул көчөлөрүнүн кесилишинде жайгашкан көлмөдө лотостор гүлдөп, аймактын көркүн ачты.
Муниципалитеттен билдиришкендей, көчмө жыйындын жүрүшүндө шаар мэри Айбек Жунушалиев аталган көлмөнүн айланасын көрктөндүрүү иштеринин жүрүшүн көрдү.
Маалыматка ылайык, буга чейин Өзгөчө кырдаалдар министрлиги тарабынан аймак санитардык жактан тазаланган. Учурда подряддык уюм тарабынан көлдүн түштүк бөлүгүн көрктөндүрүү иштери жүргүзүлүүдө.
Анын алкагында 51 түп арча отургузулуп, отургучтарды орнотуу уланууда. Ошондой эле тротуарга таман таштар жана бордюрлар төшөлүп бүттү.
Мындан сырткары, көлдү бойлой өтүүчү жөө адамдар жолуна асфальт төшөө үчүн даярдык иштери жүргүзүлүп, аймакты тазалоо жана көрктөндүрүү иштери уланууда.
