Бишкек, 22.08.25. /Кабар/. 22-23-августта Бишкекте "Кавказ – Борбор Азия 2025" аттуу эл аралык урологиялык конференция өтүүдө.
Саламаттык сактоо министрлигинен билдиришкендей, иш-чара Кавказ, Борбор Азия жана Европанын алдыңкы адистерин бириктирди.
Конференцияга Грузия, Армения, Азербайжан, Казакстан, Өзбекстан, Түркмөнстан, Тажикстан, ошондой эле Европа өлкөлөрүнөн, Түркия, Түштүк Корея жана башка мамлекеттерден адистер катышууда.
Конференциянын ишин саламаттык сактоо министри Эркин Чечейбаев ачып, бүгүн Бишкекте Борбор Азия менен Кавказ өлкөлөрүнүн өкүлдөрү жана Европанын алдыңкы адистери чогулганын белгиледи.
"Мындай кеңири катышуу медицинада улуттук же географиялык чек жок экенин дагы бир жолу тастыктайт. Кыргызстан үчүн бул конгрессти өткөрүү өзгөчө маанилүү, анткени ал жаңы мүмкүнчүлүктөрдү ачат – алдыңкы европалык тажрыйбаларды киргизүү, кесиптик диалогду өнүктүрүү жана регионалдык медицинанын эл аралык аренадагы абалын чыңдоо", - деди министр.
Конференция Европа Урологдор ассоциациясынын (EAU) демилгеси менен, Эл аралык урологдор коомунун (SIU) колдоосу алдында өткөрүлүүдө.
Уюштуруучулар белгилешкендей, мындай ири форумдун Бишкекте өтүшү Кыргызстанды эл аралык илимий кызматташуу жана медициналык билим алмашуу үчүн маанилүү аянтча катары таанууну билдирет.
