Бишкек, 04.08.26. /Кабар/. Бишкек шаарынын мэри Айбек Жунушалиев дизайн-коддорду жарандарга жана ишкерлерге акысыз берүү тапшырмасын берди.
Шаар мэриясынан билдиришкендей, дизайн-код борбор калаанын бирдиктүү архитектуралык көрүнүшүн түзүү максатында иштелип чыккан. Аны берүү үчүн жарандардан акча талап кылууга жол берилбеши керек.
Мэрдин айтымында, дизайн-кодду алуу үчүн 100 миң сом төлөө тууралуу кайрылуулар түшкөн. Буга байланыштуу Бишкек шаардык башкы архитектура жана шаар куруу башкармалыгына тиешелүү чараларды көрүү тапшырылды.
Ошондой эле дизайн-кодду берүүдө мыйзам бузуу фактылары аныкталса, материалдар укук коргоо органдарына өткөрүлөрү белгиленди.
