Бишкек, 05.09.25. /Кабар/. Бүгүн өлкөдөгү саламаттык сактоо уюмдарынын ичинен алгачкы симуляциялык борбор салтанаттуу түрдө ачылды. Бул тууралуу Саламаттык сактоо министрлигинен билдиришти.
Маалыматка ылайык, борбор Республикалык клиникалык жугуштуу оорулар ооруканасынын базасында Корей эл аралык саламаттык сактоо фондунун (KOFIH) жана Инха университетинин клиникасынын (Корея) колдоосу менен түзүлдү.
Борбордун ачылыш аземине саламаттык сактоо министри Эркин Чечейбаев, Жогорку Кеңештин депутаттары Винера Раимбачаева жана Илимбек Кубанычбеков, министрлер кабинетинин өкүлдөрү, Кореянын Кыргызстандагы элчиси Ким Гван Чже, Корей эл аралык саламаттык сактоо фондунун төрагасы Ха Иль Су, Инха университетинин президенти Чо Мен У жана саламаттык сактоо уюмдарынын жетекчилери жана башка коноктор катышты.
Симуляциялык борбор заманбап тренажёрлор жана VR-технологиялар менен жабдылган, анын ичинде MedVision Simulator Mia HF, Arthur, Leonardo жана Zarnitza бар. Алар дарыгерлерге, медайымдарга, ординаторлорго жана тез жардам кызматкерлери үчүн чыныгы кырдаалга эң жакын шарттарда өзгөчө кырдаалда жардам көрсөтүү көндүмдөрүн машыктырууга мүмкүнчүлүк берет. Бул жерде жүрөктүн токтоп калышынан тартып оор жаракаттарга чейин болгон критикалык абалдарды моделдеп, талдоо жана кайрадан машыгуу жүргүзүүгө болот.
