Бишкек, 21.05.25. /Кабар/. "Кыргызфармация" мамлекеттик ишканасы борборлоштурулган өз кампасын түзүүгө киришти. Бул тууралуу Саламаттык сактоо министрлигинен билдиришти.
Маалыматка ылайык, ишкана мамлекеттик медициналык мекемелерди дары-дармек жана медициналык буюмдар менен камсыздоого жооптуу болуп саналат.
"Кыргызфармация" МИнин директору Талант Султановдун айтымында, бүгүнкү күндө ишкана республиканын аймагындагы 300гө жакын медициналык уюмду камсыздап келет. Суроо-талап өсүп жаткандыктан жана сактоо шарттарында эл аралык стандарттарга жооп берүү муктаждыгы логистикалык базаны чыңдоону талап кылууда.
Фармацевтикалык инфраструктураны өнүктүрүү алкагында, мурдагы «Айдан Фарма» заводу жайгашкан аймактан жалпы аянты 2000 м² болгон кампа жайлары ишкананын карамагына берилди. Учурда бул жерде капиталдык оңдоо иштери жүрүп, кампаны “дистрибьюторлуктун мыкты тажрыйбаларына” (GDP) ылайык келтирүү үчүн модернизация иштери башталды.
