Бишкек, 21.08.2025. /Кабар/. Бүгүн Бишкекте Чокон Валихановдун 190 жылдыгына арналган “Чокон Валиханов: тарыхтын жарык жылдызы” даректүү тасмасынын бет ачары өттү.
Иш-чарага мамлекеттик катчы Марат Иманкулов, Казакстандын маданият, маалымат министри Аида Балаева, Кыргызстандын маданият, маалымат жана жаштар саясаты министринин орун басары Марат Тагаев, “Манас” улуттук академиясынын президенти Азиз Биймырза уулу, тасманын жаратуучулары, ошондой эле маданият тармагынын өкүлдөрү жана жаштар катышты.
Даректүү тасмада Чокон Валихановдун “Манас” эпосун изилдеген эмгектери өзгөчө орунду ээлейт. Тасмада ал 1856-жылы Ысык-Көлгө болгон илимий-сапары маалында манасчылар менен жолугуп, улуу эпостун бир бөлүгүн кагазга түшүргөнү кеңири баяндалат.
Ошондой эле Валихановдун “Манас” эпосуна берген мүнөздөмөсү, анын эпостогу тарыхый маалыматтарды илимий негизде чечмелөөсү, ошондой эле эпосту дүйнөгө таанытуудагы орду тууралуу казак жана кыргыз окумуштууларынын ойлору да камтылган.
