Бишкек, 12.11.25 /Кабар/. 12-13-ноябрда Бишкекте БУУнун коррупцияга каршы конвенциясын (UNCAC) тездетип ишке ашыруу боюнча Регионалдык платформанын экинчи жылдык конференциясы жана Борбор Азиянын ишкердик ак-ниеттүүлүк тармагынын (CABIN) жыйыны өткөрүлүүдө.
Иш-чара Кыргызстандын Башкы прокуратурасы тарабынан БУУнун Баңгизаттар жана кылмыш боюнча башкармалыгы менен биргеликте уюштурулду.
Конференциянын ачылышында башкы прокурордун биринчи орун басары Баймурза Маатов жана БУУ БКБнын Афганстан, Борбор Азия, Иран жана Пакистан боюнча өкүлү доктор Оливер Штольпе сөз сүйлөштү.
Маатов өз сөзүндө БУУнун коррупцияга каршы конвенциясы Кыргызстан үчүн коррупциянын алдын алуу жана ага каршы күрөшүүнүн стратегиялык негизи экенин белгилеп, эл аралык өнөктөштөр менен тыгыз кызматташуу укуктук институттарды чыңдоого жана мамлекеттик башкаруунун ачыктыгын жогорулатууга өбөлгө түзөрүн баса белгиледи.
Конференцияга Борбор Азия өлкөлөрүнүн антикоррупциялык органдарынын жетекчилери жана эксперттери, эл аралык уюмдардын, дипломатиялык өкүлчүлүктөрдүн жана жарандык коомдун мүчөлөрү катышууда. Иш-чаранын алкагында активдерди кайтаруу, кызыкчылыктардын кагылышын алдын алуу, маалымат берүүчүлөрдү коргоо, санариптештирүү жана криптоактивдер аркылуу жасалуучу мыйзам бузууларга каршы күрөш сыяктуу маселелер талкууланууда.
Ошондой эле ушул жылдын декабрь айында Доха шаарында өтө турган Конвенцияга катышуучу мамлекеттердин 11-сессиясына карата Борбор Азия өлкөлөрүнүн биргелешкен резолюциясынын долбоору даярдалууда.
Форумдун катышуучулары Борбор Азия мамлекеттеринин ортосундагы кызматташууну тереңдетүүгө, коррупцияга каршы күрөштө заманбап технологияларды колдонууга жана коомдук турмуштун бардык тармактарында ак-ниеттүүлүк менен жоопкерчиликтин принциптерин илгерилетүүгө даяр экендиктерин билдиришти.
