Бишкек 24.04.25 /Кабар/. Күн мурун Чыңгыз Айтматов атындагы Мамлекеттик улуттук орус драма театрында Азербайжан мамлекеттик пантомима театрынын режиссёру Жейхун Дадашов мастер-класс өткөрдү.
Маданият министрлигинен билдиришкендей, иш-чарага Бишкек шаарындагы театр оюн-зоок мекемелеринде эмгектенген актёрлор жана режиссёрлор, театр искусствосуна кызыккан жаштар, бийчилер катышты.
Жейхун Дадашов катышуучуларга пантомима өнөрүнүн сырларын, кыймыл аркылуу эмоцияны жеткирүү ыкмаларын көрсөтүп, практикалык көнүгүүлөрдү өткөрдү.
Мастер-класстын жүрүшүндө катышуучулар пантомима жанрынын өзгөчөлүктөрүн өздөштүрүп, Азербайжан театр маданияты менен таанышты.
Мындай маданий байланыштар эки элдин чыгармачыл диалогун бекемдеп, театр искусствосунун өнүгүшүнө жаңы дем берет.
Белгилей кетсек, мастер-класс Азербайжандын Кыргызстандагы маданият күндөрүнүн алкагында мерчемделген.
