Бишкек, 25.04.25. /Кабар/. Күн мурун Кыргыз улуттук "Манас" театрында Азербайжан байыркы салттуу музыкалык аспаптар ансамблинин концертти өттү. Бул тууралуу Маданият, маалымат жана жаштар саясаты министрлигинен билдиришти.
Маданий иш-чарага Кыргызстандын маданият министринин орун басары Тимурлан Ажымалиев, Азербайжандын маданият министринин орун басары Мурад Фарид оглы Гусейнов, Азербайжандын элчиси, музыка ишмерлери, салттуу музыканын күйөрмандары катышты.
Концертте ансамблдин көркөм жетекчиси жана концертмейстери, Азербайжандын эл артисти Мунис Шарифов жетектеген чыгармачыл топ жана солисттер Азербайжан Республикасынын эл артисти Тейюб Асланов жана эмгек сиңирген артист Нурия Гусейнова азербайжан элинин музыкалык казынасынан тандалган чыгармаларды, ыр-күүлөрдү тартуулады.
Азербайжан байыркы салттуу музыкалык аспаптар ансамбли Азербайжандын улуттук лидери Гейдар Алиевдин жарлыгы менен 1996-жылы түзүлгөн. Ансамбль Азербайжанда орто кылымдарда колдонулган байыркы музыкалык аспаптарда ойногону менен өзгөчөлөнөт. Буларга: Чанг, чагана, барбет, жантүр, руд, рубаб, ширван танбур сетар, чогур, ганун, ней, дэф ж. б. кирет. Курамы жалпы 15 кишиден турат. Азербайжандын Кыргызстанда өтүп жаткан Маданият күндөрүнө 12 өнөр адамы келген. Алардын 10у аспапчылар, 2 солист. Ансамблдин дагы бир өзгөчөлүгү Азербайжандын орто кылымга таандык улуттук кийимдерин кийип, сахнага чыгат.
