Бишкек, 14.04.25. /Кабар/. Бүгүн Бишкекте Азия футбол конфедерациясынын (АФК) Академиялык билим берүү борбору (ACE) менен биргеликте футбол администрациясы жана менеджменти боюнча ACFAM (AFC Certificate in Football Administration and Management) программасы старт алды. Бул тууралуу Кыргыз футбол биримдигинен билдиришти.
Белгилей кетсек, бул программа АФКга мүчө болгон 47 өлкөнүн ичинен биринчи жолу Кыргызстанда өткөрүлүп жатат.
Программанын максаты - футбол тармагында иш алып барган адистердин квалификациясын жогорулатуу болуп саналат. Бул инновациялык программага Кыргыз футбол биримдигинин аймактык ассоциацияларынан, футболдук клубдардан, футбол академияларынан, лигалардан жана башка түзүмдөрдөн келген 33 адис катышууда.
Бүгүн орун алган программанын ачылыш аземине Кыргыз футбол биримдигинин башкы катчысы Медербек Сыдыков жана АФКнын Академиялык билим берүү борборунун жетекчиси Бегимай Омуралиева катышты. КФБнын башкы катчысы бүгүнкү күндө өлкөдө футбол инфратүзүмүнүн динамикалуу өнүгүп жаткандыгынан улам футбол уюмдарында эмгектенген адистердин квалификациясын жогорулатууга чоң талап бар экендигин белгилеп, программа ишенимдүү кадрларды даярдоого жакшы мүмкүнчүлүк бергендигин айтып, катышуучуларга ийгилик каалады.
"Кыргыз Республикасында ACFAM программасынын ишке кириши биздин өлкөдө гана эмес, бүтүндөй Борбордук Азия регионунда футбол лидерлигин өнүктүрүүдөгү олуттуу кадам болуп саналат. Биз бул программаны кабыл алганыбызга сыймыктанабыз, бул футбол менеджментинин негиздерин чыңдоо боюнча АФК менен биргелешкен милдеттенмебизди ишке ашырган кадамдардын бири", - деди Медербек Сыдыков.
Академиялык билим берүү борборунун бул демилгеси — кыргыз футбол коомчулугундагы администраторлордун жана негизги кызыкдар тараптардын потенциалын жогорулатууга багытталган системалуу окуу программасы болуп эсептелет. Бул комплекстүү программа катышуучуларга дүйнөлүк мыкты тажрыйбаларга ылайык футболдук менеджмент жаатында керектүү билим жана практикалык көндүмдөрдү берет.
Программа аралаш форматта өтүп, онлайн жана офлайн форматта болот. Бул ыкма ийкемдүүлүктү камсыздап, сапаттуу билим алууга мүмкүндүк түзөт. Окуу курсу алты айга созулуп, 12 негизги модулду камтыйт. Ар бир модул интерактивдүү талкууларды, практикалык көнүгүүлөрдү камтып, катышуучулар алынган билимин өз ишинде колдонууга шарт түзөт.
Программадагы модулдар төмөнкү темаларды камтыйт: дүйнөлүк футболдун түзүмү, стратегиялык башкаруу, адам ресурстарын башкаруу, киреше табуу, коомдук жоопкерчилик жана балдарды коргоо, иш-чараларды уюштуруу, социалдык жана экологиялык туруктуулук, ММК жана коммуникациялар, финансылык башкаруу, спорт укугу, оперативдик башкаруу жана лидерликтин негиздери.
Программа 2025-жылдын октябрь айынын башында жыйынтыкталат.
