Бишкек, 09.04.25. /Кабар/. Бишкекте 11-апрелден тарта 2 автобус каттамынын кыймылы өзгөртүлөт.
Муниципалитеттен билдиришкендей, №51 автобус каттамы эми «Ак-Жол» көзөмөл-өткөрмө пунктунан Беш-Күнгөй айылына чейинки багыт боюнча жүрөт. Мурда бул каттам айланма жол менен жүрсө, эми автобустар Сарыбагыш Мыктыбек уулу, Карагул ата, 7-Апрель, Курманжан датка жана Алма-Ата көчөлөрү аркылуу каттайт.
Ошондой эле №9 автобус каттамы да жарым-жартылай өзгөртүлүп, эми автобустар Байтик баатыр көчөсүнүн ордуна Токомбаев жана Токтоналиев көчөлөрү аркылуу жүрөт.
Белгиленгендей, өзгөрүүлөр шаар тургундары жана меймандары үчүн транспорт кызматтарынын сапатын жакшыртуу, ыңгайлуулукту жогорулатуу максатында киргизилди.
