Бишкек, 22.05.25. /Кабар/. Бишкек шаарынын мэри Айбек Жунушалиев жолдордун курулушунун жүрүшү менен таанышты.
Алгач, калаа башчысы Садырбаев көчөсүнөн Тыныбеков көчөсүнө чейин жасалып жаткан Щорс көчөсүнөгү жол бордюрларын орнотуу иштерин текшерди.
Андан соң ал Ак-Марал көчөсүнүн Чортеков көчөсүнөн Шералиев көчөсүнө чейинки бордюрларды орнотуу жана жолдун негизин даярдоо иштеринин жүрүшү менен таанышты.
Ошондой эле мэр бала бакча куруу пландалган тилкени көрүп, "Арча-Бешик" конушун көрктөндүрүү иштерин өз көзү менен карап чыкты. Бул аймактагы жаш балдар үчүн ыңгайлуу шарттарды түзүү тапшырмасын да тиешелүү кызматтарга жүктөдү.
Мындан тышкары, Береговая көчөсүнүн 50 жылдык Жеңиш көчөсүнөн Семетей көчөсүнө чейинки бөлүгүндөгү капиталдык курулуш иштери менен таанышты. Азыркы учурда жол тилкесинде ирригациялык система орнотулуп, эски асфальтты чыгаруу иштери жүргүзүлүүдө.
Мэр ошондой эле Токтоналиев көчөсүнүн Масалиевден Дүйшеев көчөсүнө чейинки бөлүгүндө жүргүзүлүп жаткан курулуш иштерин да көзөмөлгө алды. Бул жерде жол жана тротуар бордюрлары, ирригациялык лотоктор менен түтүктөр орнотулууда.
Айбек Жунушалиев мыйзамсыз орнотулган курулуштар боюнча да маселелерди көтөрүп, уруксат документтери жок объекттерге тиешелүү чараларды көрүүнү шаардык кызматтарга тапшырды.
Инспекциянын жыйынтыгында калаа башчысы текшерилген бардык көчөлөрдү комплекстүү жаңылоону камсыздоо жана аткарылып жаткан иштердин сапатына өзгөчө көңүл буруу милдетин койду.
