Бишкек, 08.07.26. /Кабар/. “Ачык кабинет” медиадолбоорунун алкагында энергетика министри Алтынбек Рысбеков Бишкек шаарындагы “Мурас” көмөк чордонун реконструкциялоо иштеринин жүрүшү менен таанышты.
Анын айтымында, “Мурас” 110/10 кВ көмөк чордону Бишкектин энергетикалык тутумун өнүктүрүүнүн алкагында реконструкцияланууда.
“Көмөк чордон шаардын түштүк-батыш бөлүгүндө жайгашып, ири инфраструктуралык объекттерди электр энергиясы менен камсыздоодо стратегиялык мааниге ээ. Реконструкция аяктагандан кийин көмөк чордон 51 миң 200 көрүүчүгө ылайыкталган жана Дүйнөлүк көчмөндөр оюндарынын ачылыш аземи өтө турган “Бишкек Арена” стадионун, ошондой эле “МИК” ААК тарабынан курулуп жаткан турак жай комплекстерин ишенимдүү электр энергиясы менен камсыз кылат. Көмөк чордондун жаңылануусу шаардык электр камсыздоонун туруктуулугу үчүн өзгөчө мааниге ээ. Учурда бул жерде негизги техникалык иштер жүрүп жатат. Объект тиешелүү адистердин маалыматы боюнча жакынкы бир жуманын ичинде толук ишке киргизүүгө даяр болот”, — деди ал.
Ошондой эле “Мурас” көмөк чордону ишке берилгенден кийин шаардык электр тармагындагы жүктөм кайра бөлүштүрүлүп, “Ново-Южная”, “Арча-Бешик” жана “Пиковая котельная” көмөк чордондорундагы ашыкча жүктөм азаяры маалымдалды.
Белгиленгендей, бул көмөк чордон борбор шаарыбыздын түштүк-батыш бөлүгүндө электр энергиясы менен камсыздоонун ишенимдүүлүгүн жана сапатын жогорулатууга шарт түзөт.
Жалпысынан алганда, “Мурас” көмөк чордонун реконструкциясы жөн гана техникалык жаңылоо эмес, шаардык энергетикалык системаны бекемдөөгө жана ири социалдык маанидеги объекттерди туруктуу электр энергиясы менен камсыздоого багытталган стратегиялык долбоор болуп саналат.
