Бишкек, 01.08.26. /Кабар/. Бишкек – Нарын – Торугарт унаа жолунда таш тазаланууда, жол бир тараптуу ачык. Бул тууралуу Транспорт жана коммуникациялар министрлигинен билдиришти.
Маалыматка ылайык, 1-августка караган түн саат 00:00 – 03:00 чамасында аталган жолдун 138-139-чакырымында таш түшкөн.
"Учурда жолдун бир тилкеси аркылуу транспорт каражаттарынын кыймылы уюштурулуп, жол бир тараптуу ачык. Жерине 1 жүктөгүч, 1 автогрейдер, 4 экскаватор жана 4 HOWO үлгүсүндөгү оор жүк ташуучу унаа тартылып, жолду тазалоо иштери ыкчам жүргүзүлүп жатат", - деп айтылат маалыматта.
Жолду толугу менен ачуу боюнча иштер уланууда.
Министрлик айдоочуларды этият болуп, жол кыймылынын эрежелерин так сактоону жана убактылуу киргизилген чектөөлөрдү эске алууну өтүнөт.
