Бишкек, 11.09.26. /Кабар/. Талас шаарында жакынкы мүнөттөрдө “Баластан” балдарды өнүктүрүү жана оюн-зоок борборунун ачылышы өтөт. Президент Садыр Жапаровдун түздөн-түз колдоосу менен бой көтөргөн бул масштабдуу долбоор аймактын социалдык-экономикалык турмушуна чоң салым болот.
Жалпы аянты 6,5 гектарды ээлеген заманбап комплекс 9 корпустан турат. Долбоор толук кубаттуулукта ишке кирген соң 500гө жакын жергиликтүү тургун туруктуу жумуш орду менен камсыз болот.
“Баластан" борборундагы негизги мүмкүнчүлүктөр:
- Инновациялык робототехника борбору, заманбап музей жана илимий-агартуучулук иш-чаралар үчүн конгресс-зал.
- Акыркы үлгүдөгү кинотеатр, боулинг, түрдүү аттракциондор жана улуттук да, дүйнөлүк да ашкананы камтыган кенен фудкорт.
- Ден соолугунун мүмкүнчүлүгү чектелген балдар үчүн атайын ылайыкташтырылган коопсуз оюн аянтчалары жана инфраструктура.
- Калкка ыңгайлуу кызмат көрсөтүүчү заманбап соода түйүндөрү.
Белгилей кетсек, бүгүн, 11-сентябрда Талас шаарында Эгемендүүлүктүн 35 жылдык мааракеси белгиленүүдө. Иш-чарага президент Садыр Жапаров катышууда.
