Бишкек, 04.11.25. /Кабар/. 30-октябрда Берлин филармониясында "Жибек жолунун үндөрү жана түстөрү" аттуу гала-концерт өттү. Бул тууралуу Кыргызстандын Германиядагы элчилигинен билдиришти.
Музыкалык иш-чара эл аралык Into the Open маданий фестивалы тарабынан ТҮРКСОЙ эл аралык түрк маданияты уюмунун, ошондой эле Түрк мамлекеттер уюмуна мүчө мамлекеттердин дипломатиялык өкүлчүлүктөрүнүн колдоосу менен уюштурулду.
Иш-чарага Германиянын мамлекеттик органдарынын өкүлдөрү, ишкер жана маданий чөйрөлөрдүн өкүлдөрү, бир катар элчилер жана дипломатиялык корпустун мүчөлөрү катышты.
Кыргызстан концерттик программада кеңири чагылдырылды. Атап айтканда, Берлин филармониясынын сахнасында КР эмгек сиңирген артисти Жылдыз Осмоналиева, элдик жана заманбап кыргыз чыгармаларын аткарды. Ошондой эле "Манас" эпосун эң узак айтып берүү боюнча Гиннестин рекорддор китебине кирип, дүйнөгө белгилүү болгон манасчы Рысбай Исаков өз өнөрүн тартуулады.
Бардык түрк өлкөлөрүнүн артисттеринин чыгышы көрүүчүлөрдүн чоң суктануу жана жылуу кабыл алуусуна ээ болуп, түрк элдеринин бай маданий мурасынын айкын символуна айланды.
Бул иш-чара ТМУга мүчө мамлекеттер менен Германиянын ортосундагы маданий диалогду өнүктүрүүнүн маанилүү аянтчасы болуп, түрк элдеринин бирдиктүү маданий мейкиндигин чыңдоодогу ТҮРКСОЙдун ролун дагы бир жолу көрсөттү.
