Бишкек, 03.04.25. /Кабар/. Бүгүн Бишкектеги "Манас" театрында дүйнөгө белгилүү вокалдык коуч, GRAMMY Recording Academy мүчөсү жана GrammyU ментору Карина Купердин мастер-классы ийгиликтүү аяктады. Бул тууралуу Маданият, маалымат жана жаштар саясаты министрлигинен билдиришти.
Маданият министринин биринчи орун басары Союзбек Надырбеков Карина Купердин кыргыз маданиятына кошкон салымын жана эл аралык деңгээлдеги ийгиликтерин баса белгилеп, министрликтин ыраазычылык катын тапшырып, мындан аркы ишине ийгиликтерди каалады.
Ошондой эле бул иш-чараны Кыргызстанда уюштурууга көмөк көрсөткөн Виктория Кочкорбаева менен Сайрагүл Эсенбаева да Маданият министрлигинин ыраазычылык каты менен сыйланышты.
Аталган мастер-класс вокалдык өнөрдү өркүндөтүүгө кызыккан жаш таланттар жана кесипкөй музыканттар үчүн тажрыйба алмашуу аянтчасы болду. Иш-чаранын жүрүшүндө Карина Купер катышуучулар менен вокалдык техника, үн тууралоо, сахнада өзүн алып жүрүү жана чыгармачыл потенциалды ачуу боюнча тажрыйбасы менен бөлүштү.
Мастер-класстын соңунда катышуучуларга сертификаттар тапшырылып, алар өздөрүнүн өнөрүн өркүндөтүүгө дагы бир мүмкүнчүлүк жаралганын билдиришти. Иш-чарага маданият жана искусство тармагынын өкүлдөрү, музыкалык мектептердин окутуучулары жана студенттер катышып, мастер-класс жогорку деңгээлде уюштурулгандыгын баса белгилешти.
Карина Купер – дүйнөлүк деңгээлдеги вокалдык коуч жана GRAMMY Recording Academy мүчөсү, GrammyU ментору. Анын мастер-класстары дүйнөнүн ар кайсы бурчунда өтүп, ар дайым чыгармачыл инсандар үчүн дем-күч жана шыктануу булагы болуп келет.
Карина Купердин мастер-классы Маданият министрлигинин колдоосу менен уюштурулуп, Кыргыз улуттук “Манас” театрында 1-апрелден 3-апрелге чейин өттү.
